Exo 19 | TVK | STEP | Mol-Isrel xil lamea reling ut Revidim e lakakao laba. Ma e aveti tol xati dutou ni ngan xa latemea ra hal Isip, xil mei lastal e uruvuol xa de pe Vathu Senae. E rute ak, xil lakili ni horao mae xil en.

Exodus 19

Hi Misepin mi Mol-Isrel Xil Pe Vathu Senae

Eksodas 19:1-8, 16-20

1 Mol-Isrel xil lamea reling ut Revidim e lakakao laba. Ma e aveti tol xati dutou ni ngan xa latemea ra hal Isip, xil mei lastal e uruvuol xa de pe Vathu Senae. E rute ak, xil lakili ni horao mae xil en. 3 Di, Mosis be vathu tengan vasepin vatel Hi.

E Iahova mikei ba mini nggo vathu ak e bit, “Mosis, melele xa utilomun uhe tan, ha uhiteni mi mol-Isrel xil imak: 4 'Mutepus naha xa inou, Iahova, natepol ni mi mol-Isip xil. E mutepusi tetep iaxa nateleh xamim mei mustal inggak visal nou tetel xeihen e eheien navan texoni ngan xa vevaxum tei di nggur xol tuten xil ni aveoun. 5 Ma xosali, xosxa mulong xat sepinien navan e muhusil xat rae xil navan, ma xamim mei muhe moletin xati xil navan. Reitin xa holesok xil vus e ut etan be navan, e xamim iaxa, nabosei tengan nipisen eheien navan mi xamim ili tetit moletin sav xil e ut etan. 6 Xamim muhe tetit moletin eo xati navan, e xamim vus ti mumot minou ixoni vanut pris xil. E inou nihe suv toto namim.”

7 Melele xa Iahova misepin mini bus, Mosis dilomun be tan e mikes viton moletin xil. Holesok xil vus xa Iahova tehiteni mini, xi bit mesen ni mi xil. 8 Melele xa moletin xil lalonge, labiteni labit, “Momal, xamem mupol vuol ni holesok xil vus xa Iahova biteni.” Ma, Mosis dilomun be nesao tengan ha ihit mesen sepinien nae mi Iahova.

16 Di, makoe te melengien tol nen, moletin xil ladi tamu e rute xa xil lakili ni horao mae xil en, e laketeh lapus momah tei xa eilep mistal e mikutaxol romulit vathu ak e veta mirum e milangas. Di, amaru tei misel nggeih xa nggeih, e melele xa moletin xil ak lalonge, lexil malilil e ulixil mikan pupu. 17 Di, Mosis del xil labe reling horao mae xil e laba lasoh pe vathu tengan lavisu mi Hi. 18 Xil lapusi xa Iahova bemei etan ba duxoh romulit Vathu Senae nggoni upang e eas mikutaxole. Tan mulul nggeih e eas mituvan be nesao nggoni venu. 19 E rae amaru di bemei sangas mu visal xil, e di misel nggeih pilei sung. Mosis misepin mi Hi, e Hi misep rilomun ni mini nggo veta xa posou. 20 Melele xa Iahova duxoh romulit Vathu Senae, xi mikes Mosis tengan ha ihisu mini en. Ma Mosis pungei be nesao tengan vapusi.